یہ مسائلِ تصوف، یہ ترا بیان غالب
تجھے ہم ولی سمجھتے جو نہ بادہ خوار ہوتا
مرزا اسد اللہ خاں غالب رائج معنوں میں صوفی نہیں تھے اور نہ ہی باقاعدہ طور پر کسی صوفی سلسلے میں بیعت تھے۔ اس ضمن میں بعض محققین نے نجانے بڑے تیقن سے انھیں چشتی نظامی کیسے قرار دے دیا ہے۔ حال آں کہ اس دعوے کی تصدیق کے لیے معاصر ادبی مآخذ، چشتی منابع اور ذخیرہء غالبیات میں ضروری تائیدی شواہد نہیں ملتے۔ البتہ اس میں کوئی شک نہیں ہے کہ وہ طبعاً چشتی مشربِ طریقت ہی کے زیادہ قریب تھے اور اگر کبھی وہ کسی سلسلہء طریقت سے منسلک ہوتے تو وہ یقیناً چشتی نظامی سلسلہ ہی ہوتا۔ انھیں دہلی کے معروف بزرگ خواجہ فخر الدین فخرِ جہاں چشتی نظامی کے خانوادے سے دلی عقیدت تھی اور حضرت کے پوتے خواجہ غلام نصیرالدین کالے میاں سے تو عمر بھر ان کے بہت قریبی مخلصانہ مراسم رہے۔ کالے میاں حضرت خواجہ شاہ محمد سلیمان تونسوی چشتی نظامی کے مرید و خلیفہ تھے.
غالب بنیادی طور پر ایک سر کش روح تھے اور تا دیر کسی تقلیدی روش پر چلتے رہنا ان کے لیے ممکن نہیں تھا۔ مذکورہ چشتی خانوادے سے غالب کا یہ تعلقِ خاطر بھی اس لیے نہیں تھا کہ تیموری دربار یا غالب کا سسرالی گھرانا کئی پشتوں سے اس خاندان سے عقیدت رکھتا تھا یا اس وابستگی سے کسی دنیوی منفعت کا حصول ان کے پیشِ نظر تھا بلکہ اس محبت و ارادت کی جڑیں غالب کے اپنے عالی دماغ اور صافی دل میں بہت گہری تھیں۔
دل چسپ ہے کہ غالب کو باقاعدہ صوفی نہ ماننے والوں کو بھی یہ بہ ہر حال ماننا پڑتا ہے کہ وہ صوفیوں کے استاد تھے۔ وہ کچھ یوں کہ اس عہد کے متصوفانہ پس منظر کے حامل متعدد افراد فنِ شاعری میں ان کے شاگرد تھے۔ غالب کے صوفی شاگردوں میں بلا تفریق و تخصیص تقریباً سبھی سلاسلِ طریقت کے لوگ نظر آتے ہیں۔ اس اعتبار سے یہ رند مشرب استادِ صوفیہ مجمع السلاسل بھی ٹھہرتے ہیں۔ ان شاگردوں میں سے بعض کے ساتھ غالب کے بہت بے تکلف دوستانہ تعلقات کی معتبر شہادتیں بھی ملتی ہیں۔ صوفی تلامذہء غالب میں سے کچھ بزرگ تو خود مسلمہ سجادہ نشین بھی تھے اور مریدوں کا وسیع حلقہ بھی رکھتے تھے۔
غالب کے شاگردوں کے بارے میں لکھی گئی چند اچھی کتابوں میں ان کے بعض صوفی شاگردوں کے یہ نام ملتے ہیں:
دیوان سید امام الدین علی اثر اجمیری چشتی نظامی، مولانا اسماعیل میرٹھی قادری، باقر علی باقر بہاری چشتی نظامی، شیخ عبد السمیع انصاری رام پوری چشتی صابری، قاضی عبد الرحمن تحسین پانی پتی نقشبندی، احمد حسین تمنا مرزا پوری نقشبندی، خورشید احمد خورشید نقشبندی، محمد اشفاق حسین زکی مارہروی قادری برکاتی، میر فخر الدین حسین سخن دہلوی چشتی نظامی، سرفراز علی سید شاہ جہان پوری نقشبندی، سید شاہ عالم شائق مارہروی، نواب مصطفیٰ خاں شیفتہ و حسرتی نقشبندی، نواب سید شیر زمان صاحب دہلوی قادری، جلیل الدین حسین صوفی منیری، سید قطب الدین دلاور علی جعفری ہاپوڑی، بہادر شاہ ظفر چشتی نظامی، مولانا محمد ولایت علی عزیز صفی پوری، سید احمد حسن مودودی فدا سہسوانی چشتی نظامی، قاضی محمد عنایت حسین فراق بدایونی چشتی نظامی تونسوی، مولانا عبد الصمد کلیم چشتی نظامی، محمد حسین محمود بجنوری قادری، منشی سخاوت حسین انصاری مدہوش بدایونی قادری برکاتی، میر ابراہیم علی مودودی وفا سہسوانی چشتی نظامی، مولوی امو جان ولی دہلوی قادری، حکیم محمد مراد علی ہوشیار چشتی
